ತಾಲಿಬಾನಿಗಳಿಂದ ಪಾರಾಗುವಾಗ ವಿಮಾನದಿಂದ ಬಿದ್ದು ಪುಟ್ಬಾಲ್ ಆಟಗಾರ ದಾರುಣ ಸಾವು.

ಕಾಬೂಲ್: ತಾಲಿಬಾನ್ ಉಗ್ರರು ಅಫ್ಘಾನಿಸ್ತಾನ ರಾಜಧಾನಿ ಕಾಬೂಲ್ ಪ್ರವೇಶಿಸದ ಸಂದರ್ಭದಲ್ಲಿ ಅಮೆರಿಕ ವಾಯುಸೇನೆ ವಿಮಾನದ ರೆಕ್ಕೆಯಲ್ಲಿ ಕುಳಿತು ದೇಶದಿಂದ ಹೊರ ಹೋಗಲು ಯತ್ನಿಸಿದ್ದ ಹಲವರು ಬಿದ್ದು ಪ್ರಾಣ ಕಳೆದುಕೊಂಡಿದ್ದಾರೆ.

ಹೀಗೆ ವಿಮಾನದಿಂದ ಬಿದ್ದು ಮೃತಪಟ್ಟವರಲ್ಲಿ ಒಬ್ಬ ಅಫ್ಘಾನಿಸ್ತಾನದ ರಾಷ್ಟ್ರೀಯ ಫುಟ್ಬಾಲ್ ತಂಡದ ಆಟಗಾರ ಎಂದು ಗೊತ್ತಾಗಿದೆ. 19 ವರ್ಷದ ಜಾಕಿ ಅನ್ವಾರಿ ವಿಮಾನದ ರೆಕ್ಕೆಯ ಮೇಲಿಂದ ಬಿದ್ದು ಮೃತಪಟ್ಟಿರುವುದಾಗಿ ಆಫ್ಘನ್ ಕ್ರೀಡಾ ನಿರ್ದೇಶನಾಲಯ ಖಚಿತಪಡಿಸಿದೆ.

ಕಾಬೂಲ್ ವಿಮಾನನಿಲ್ದಾಣದಿಂದ ಅಮೆರಿಕ ವಾಯುಸೇನೆ ವಿಮಾನದ ರೆಕ್ಕೆ ಮೇಲೆ ಕುಳಿತು ಹೋಗುವಾಗ ನಾಲ್ವರು ಮೇಲಿಂದ ಕೆಳಗೆ ಬಿದ್ದು ಮೃತಪಟ್ಟಿದ್ದಾರೆ. ಜಾಕಿ ಅನ್ವರಿ ಕೂಡ ಮೃತಪಟ್ಟಿದ್ದಾನೆ.

ಮೆಸ್ಸಿ ದಾಖಲೆ ಮುರಿದ ಭಾರತದ ಫುಟ್ಬಾಲ್ ತಾರೆ ಸುನೀಲ್ ಛೇಟ್ರಿ.

ದೋಹಾ: ಭಾರತ ಫುಟ್​ಬಾಲ್​ ತಂಡದ ನಾಯಕ ಸುನೀಲ್​ ಛೇಟ್ರಿ ಅಂತಾರಾಷ್ಟ್ರೀಯ ಫುಟ್​ಬಾಲ್​ನಲ್ಲಿ ಸಕ್ರಿಯ ಇರುವ ಆಟಗಾರರ ಪೈಕಿ 2ನೇ ಅತ್ಯಧಿಕ ಗೋಲು ಗಳಿಕೆಯ ದಾಖಲೆ ಬರೆದಿದ್ದಾರೆ. ಅರ್ಜೆಂಟೀನಾದ ತಾರೆ ಲಿಯೋನೆಲ್​ ಮೆಸ್ಸಿ ಅವರ 72 ಗೋಲು ಗಳಿಕೆಯ ಸಾಧನೆಯನ್ನು ಹಿಮ್ಮೆಟ್ಟಿಸುವ ಮೂಲಕ ಛೇಟ್ರಿ ಈ ಸಾಧನೆ ಮಾಡಿದ್ದಾರೆ.

36 ವರ್ಷದ ಸುನೀಲ್​ ಛೇಟ್ರಿ ಸೋಮವಾರ ರಾತ್ರಿ ಬಾಂಗ್ಲಾದೇಶ ವಿರುದ್ಧ ನಡೆದ 2022ರ ಫಿಫಾ ವಿಶ್ವಕಪ್​ ಮತ್ತು 2023ರ ಎಎಫ್​​ಸಿ ಏಷ್ಯನ್​ ಕಪ್​ ಅರ್ಹತಾ ಸುತ್ತಿನ ಪಂದ್ಯದ ವೇಳೆ 2 ಗೋಲು ಸಿಡಿಸುವ ಮೂಲಕ ಮೆಸ್ಸಿ ಅವರನ್ನು ಹಿಂದಿಕ್ಕಿದರು. ಈ ಪಂದ್ಯಕ್ಕೆ ಮುನ್ನ ಮೆಸ್ಸಿ ಜತೆಗೆ ಸಮಬಲದಲ್ಲಿದ್ದ ಛೇಟ್ರಿ ಇದೀಗ ಅಂತಾರಾಷ್ಟ್ರೀಯ ಫುಟ್​ಬಾಲ್​ನಲ್ಲಿ ಗೋಲು ಗಳಿಕೆಯನ್ನು 74ಕ್ಕೆ ವಿಸ್ತರಿಸಿಕೊಂಡಿದ್ದಾರೆ.

ಹಾಲಿ ಆಟಗಾರರ ಪೈಕಿ ಪೋರ್ಚುಗಲ್​ನ ಸೂಪರ್​ ಸ್ಟಾರ್​ ಕ್ರಿಶ್ಚಿಯಾನೊ ರೊನಾಲ್ಡೊ 103 ಗೋಲು ಗಳಿಕೆಯೊಂದಿಗೆ ಅಗ್ರಸ್ಥಾನದಲ್ಲಿದ್ದಾರೆ. ಭಾರತದ ಸ್ಟಾರ್​ ಛೇಟ್ರಿ 73 ಗೋಲು ಗಳಿಸಿರುವ ಯುಎಇಯ ಅಲಿ ಮಬ್​ಕೌಟ್​ ಅವರನ್ನೂ ಹಿಂದಿಕ್ಕಿದ್ದಾರೆ. ಇದರಿಂದ ಮೆಸ್ಸಿ ಈಗ 4ನೇ ಸ್ಥಾನಕ್ಕೆ ಕುಸಿತ ಕಂಡಿದ್ದಾರೆ.

ಛೇಟ್ರಿ ದಾಖಲೆಯ ನೆರವಿನಿಂದ ಭಾರತ ತಂಡ ಫಿಫಾ ವಿಶ್ವಕಪ್​ ಅರ್ಹತಾ ಸುತ್ತಿನಲ್ಲಿ 6 ವರ್ಷಗಳ ಬಳಿಕ ಗೆಲುವು ದಾಖಲಿಸಿದ್ದು, 20 ವರ್ಷಗಳ ಬಳಿಕ ವಿದೇಶದಲ್ಲಿ ಗೆಲುವಿನ ಸಾಧನೆಯನ್ನೂ ಮಾಡಿದೆ. ಛೇಟ್ರಿ ಈಗ ಫುಟ್​ಬಾಲ್​ನ ಸಾರ್ವಕಾಲಿಕ ಗರಿಷ್ಠ ಗೋಲು ಸ್ಕೋರರ್​ಗಳ ಟಾಪ್​ 10 ಪಟ್ಟಿ ಪ್ರವೇಶದಿಂದಲೂ ಕೇವಲ ಒಂದು ಗೋಲು ಹಿಂದಿದ್ದಾರೆ. ಸದ್ಯ ತಲಾ 75 ಗೋಲು ಗಳಿಸಿರುವ ಕುವೇಟ್​ನ ಬಶರ್​ ಅಬ್ದುಲ್ಲ, ಹಂಗೆರಿಯ ಸ್ಯಾಂಡರ್​ ಕೋಕ್​ಸಿಸ್​ ಮತ್ತು ಜಪಾನ್​ನ ಕುನಿಶಿಗೆ 10ನೇ ಸ್ಥಾನದಲ್ಲಿ ನೆಲೆಸಿದ್ದಾರೆ.

ಭಾರತ ಪರ 3 ದಶಕಗಳಲ್ಲಿ ಗೋಲು ಬಾರಿಸಿದ ಮೊದಲ ಆಟಗಾರರೆಂಬ ವಿಶೇಷ ದಾಖಲೆಯನ್ನೂ ಛೇಟ್ರಿ ಬರೆದಿದ್ದಾರೆ. ಅವರು 2007ರಲ್ಲಿ ಭಾರತ ಪರ ಮೊದಲ ಗೋಲು ಬಾರಿಸಿದ್ದರು. ಇದೀಗ 2000, 2010 ಮತ್ತು 2020ರ ದಶಕದಲ್ಲಿ ಗೋಲು ಬಾರಿಸಿದ ದಾಖಲೆ ನಿಮಿರ್ಸಿದ್ದಾರೆ.

ಫಿಫಾ ವಿಶ್ವಕಪ್‌ : ಭಾರತಕ್ಕೆ ಕತಾರ್‌ ತಂಡ ಸವಾಲು

ದೋಹಾ (ಕತಾರ್‌) : ಫಿಫಾ ವಿಶ್ವಕಪ್‌ ಹಾಗೂ ಏಶ್ಯನ್‌ ಕಪ್‌ ಜಂಟಿ ಕ್ವಾಲಿಫೈಯರ್‌ ಕೂಟದಲ್ಲಿ ಆಡಲಿರುವ ಭಾರತ ಗುರುವಾರ ಬಲಿಷ್ಠ ಕತಾರ್‌ ತಂಡವನ್ನು ಅವರದೇ ಅಂಗಳದಲ್ಲಿ ಎದುರಿಸಲಿದೆ.

ಭಾರತಕ್ಕೆ ಇದು ಕತಾರ್‌ ಎದುರಿನ ಸೆಕೆಂಡ್‌ ಲೆಗ್‌ ಪಂದ್ಯವಾಗಿದೆ. 2019ರ ಮೊದಲ ಮುಖಾಮುಖೀಯ ವೇಳೆ ಗೋಲ್‌ ಲೆಸ್‌ ಡ್ರಾ ಸಾಧಿಸಿದ್ದು ಭಾರತ ಅಮೋಘ ಸಾಧನೆ ಎನಿಸಿತ್ತು.

ಇದು “ಇ’ ವಿಭಾಗದ ಮುಖಾಮುಖೀಯಾಗಿದ್ದು, ಕತಾರ್‌ ಅಗ್ರಸ್ಥಾನದಲ್ಲಿದೆ. ಆರರಲ್ಲಿ 5 ಜಯ ಸಾಧಿಸಿದ ಹಿರಿಮೆ ಕತಾರ್‌ನದ್ದು. ಕೊನೆಯದಾಗಿ ಐರ್ಲೆಂಡ್‌ ಎದುರಿನ ಫ್ರೆಂಡ್ಲಿ ಪಂದ್ಯವನ್ನು 1-1ರಿಂದ ಡ್ರಾ ಮಾಡಿಕೊಂಡಿತ್ತು.

ಅಭ್ಯಾಸ ಕೊರತೆ. ಇತ್ತ ಭಾರತ ಯುಎಇ ವಿರುದ್ಧದ ಫ್ರೆಂಡ್ಲಿ ಮ್ಯಾಚ್‌ನಲ್ಲಿ 0-6 ಗೋಲುಗಳ ಆಘಾತಕ್ಕೆ ಸಿಲುಕಿತ್ತು. ಹಾಗೆಯೇ ಕಳೆದ ತಿಂಗಳು ಕೋಲ್ಕತಾದಲ್ಲಿ ನಡೆಯಬೇಕಿದ್ದ ರಾಷ್ಟ್ರೀಯ ಶಿಬಿರ ರದ್ದುಗೊಂಡದ್ದು.

 ಭಾರತೀಯರ ಅಭ್ಯಾಸಕ್ಕೆ ದೊಡ್ಡ ಹಿನ್ನಡೆಯಾಗಿ ಪರಿಣಮಿಸಿದೆ. ನಾಯಕ ಸುನೀಲ್‌ ಚೆಟ್ರಿ ಕೋವಿಡ್‌ ಕಾರಣದಿಂದ ಎರಡೂ ಅಭ್ಯಾಸ ಪಂದ್ಯಗಳನ್ನು ತಪ್ಪಿಸಿಕೊಂಡಿದ್ದಾರೆ.

ಫಿಫಾ ರ್‍ಯಾಂಕಿಂಗ್‌ನಲ್ಲೂ ಕತಾರ್‌ ಭಾರತಕ್ಕಿಂತ ಬಹಳಷ್ಟು ಮೇಲಿದೆ. ಕತಾರ್‌ 58, ಭಾರತ 105ನೇ ರ್‍ಯಾಂಕಿಂಗ್‌ ಹೊಂದಿದೆ. 5 ಪಂದ್ಯಗಳಿಂದ 3 ಅಂಕ ಸಂಪಾದಿಸಿರುವ ಭಾರತ “ಇ’ ವಿಭಾಗದಲ್ಲಿ 4ನೇ ಸ್ಥಾನದಲ್ಲಿದೆ. ಕತಾರ್‌ ಆಕ್ರಮಣವನ್ನು ಚೆಟ್ರಿ ಪಡೆ ತಡೆದು ನಿಂತೀತೇ ಎಂಬುದು ದೊಡ್ಡ ಪ್ರಶ್ನೆ.